Valmøte og øving i totalberedskap

Hjelpekorpset i Leikanger hadde nyleg valmøte, kombinert med fagleg påfyll og praktisk øving. Sjølve valmøtet gjekk raskt unna, og alle som var på val i lokalrådet tok attval. Vi takkar alle som stiller opp vidare og bidreg til å halde aktiviteten og beredskapen oppe. I samband med møtet fekk vi besøk av beredskap hjå Statsforvaltaren i Vestland, som heldt eit føredrag om totalberedskap. Temaet er både høgaktuelt og alvorleg i tida vi lever i, og syner kor viktig frivillige er i beredskapsarbeidet. Vi set stor pris på at Statsforvaltaren tok seg tid til å kome og dele kunnskap med oss. Etter føredraget vart det tid til pizza og gode diskusjonar rundt bordet, før kvelden vart avslutta med ei praktisk øving. Her simulerte vi bortfall av straum, internett og mobildekning. Ved å ta i bruk skåphengar, straumaggregat og Starlink fekk vi raskt på plass områdebelysning ute, varme og lys inne i hengaren, samt internett. Til slutt testa vi også gateway og repeater på nødnett. Øvinga viste at hjelpekorpset er godt drilla på denne typen situasjonar, og at det tek kort tid før vi er operative dersom viktige samfunnsfunksjonar skulle falle bort. Kvelden vart opplevd som både lærerik og nyttig, med mange gode øvingsmoment som styrkar den vidare beredskapen i hjelpekorpset.